Русская Православная Церковь
Московский Патриархат
Белорусская
Православная Церковь

При использовании материалов
ссылка на сайт
www.spas-monastery.by обязательна

Дорогие гости сайта!
Если у кого-либо из вас сохранились материалы, касающиеся истории нашего монастыря (документы, фотографии и др.), пишите нам по адресу электронной почты spas.monastery@gmail.com Будем благодарны за любую помощь.

Канон святителю Митрофану, епископу Воронежскому

Распечатать

Глас 8

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Святителю отче Митрофане, моли Бога о нас.

От многих зол многаго уныния исполнены, к тебе прибегаем, святителю Христов Митрофане, и от тебе скорыя помощи и заступления ныне требуем.

Святителю отче Митрофане, моли Бога о нас.

Страстей нас брани смущают, пастырю преподобне, ты же умири нас твоим благоприятным к Богу ходатайством.

Слава: От бед и скорбей нас, чудотворче святый, избавив, мужественное в добродетелех преспеяние всем даруй, да вси о тебе, священнейший Митрофане, радуемся.

И ныне: Молитву нашу приими, Пречистая, и молитвою Твоею всемощною избавитися нам от враг видимых и невидимых, от грехов же и всякия муки моли, Егоже родила еси, Человеколюбца Бога.

Песнь 3

Небеснаго круга Верхотворче, Господи и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Святителю отче Митрофане, моли Бога о нас.

Покровителя жизни нашея и молитвенника к Богу почитаем тя, приснославный отче наш Митрофане: на стезю нас покаяния направи, архиереев красото и верных утверждение.

Святителю отче Митрофане, моли Бога о нас.

Молим душевное наше смущение и тьму бесовских наваждений в нас разорити: тебе бо, святе, дадеся благодать Святаго Духа злыя духи прогоняти.

Слава: Недугующе телом, недугуем и душею, Богоблаженне, ты же не остави нас во гресех наших погибнути, но в них же и сам яко человек искушаемь был еси и нам, искушаемым, ныне помози.

И ныне: Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

Седален, глас 2

Во святительстве благочестно пожил еси, святителю Богоявленне, люди к Богоразумию словом и делом наставил еси и Богу до конца угодил еси. Сего ради от Него нетлением и чудесы, отче Митрофане, почтился еси, яко причастник Божия благодати.

Слава, и ныне, Богородичен:

Мучеников, пророков, апостолов, иерархов, преподобных и святых всех от века праведных похвала Ты еси, Пречистая, темже Тя молим: молися с ними ко Господу, да спасет души наша.

Песнь 4

Услышах, Господи, смотрения Твоего таинство, разумех дела Твоя и прославих Твое Божество.

Святителю отче Митрофане, моли Бога о нас.

Пламень погаси в нас плотских обуреваний и нечистых наших помышлений, да пламени геенскаго огня твоими молитвами, Митрофане, избавимся.

Святителю отче Митрофане, моли Бога о нас.

Душу и помышление к тебе простираем, святителю Богоизбранне: согрей нашу веру и любовь яже к Богу, да, закону Его усердно последующе, прейдем поприще нашего спасения непреткновенно.

Слава: Столп крепости стяжавше тя от Бога, от видимых и невидимых врагов ограждаемся тобою безбедно; темже тя вси по долгу, Митрофане, ублажаем.

И ныне: Чертоже Незаходимаго Света, Дево, несмы достойны чертога Небеснаго греховныя ради вины; ты же, Богородительнице, ради обнаженнаго на Кресте сладкаго Твоего Сына и Благаго нашего Господа, покрый стыд лица нашего и спаси нас.

Песнь 5

Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Святителю отче Митрофане, моли Бога о нас.

Молим ти ся и вопием всеусердно: исполни, Боговдохновенне, веселия живот наш, покрывая нас крепким покровом защищения твоего от глада, язвы и междоусобныя брани, яко можеши, отче, аще хощеши.

Святителю отче Митрофане, моли Бога о нас.

Мрак наших заблуждений и житейския гордости светлостию святых молитв твоих, Митрофане, прожени, да помощию твоею грехов оставление приимше, милость у Христа Бога обрящем.

Слава: На одре немощи и уныния низлежащу ми, подаждь руку помощи, пастырю Боговозлюбленне, и не остави мя лишенна быти твоего спасительнаго благодатию Святаго Духа посещения.

И ныне: Чистейшая еси паче Ангельских чинов, от Неяже Источник святыни воплотися нас ради, да освятит естество человеческое, молитвами Твоими, Богородице, избави нас от тимения нечистых наших деяний и неподобных глаголаний.

Песнь 6

Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Святителю отче Митрофане, моли Бога о нас.

Граду твоему заступник буди и паствы твоея хранитель, грады же и страны чтущих любовию память твою необоримым молитв твоих предстательством огради, да вси тобою, Богомудре Митрофане, хвалимся.

Святителю отче Митрофане, моли Бога о нас.

Яко защитника тя от Бога ведуще, власть на дусех нечистых велию имуща, молим от злаго действия злых духов наши души сохранити безнаветны.

Слава: По долгу блажат тя вернии, − радуйся, Митрофане, − зовуще: ты бо воистинну Российстей Церкви радование и похвала, и тя чтущим на вся враги одоление, досточудне.

И ныне: Гору Тя мысленную и Лествицу Иаковлю пророцы нарицают, Еюже Бог к человеком сниде, погибшую драхму взыскати хотя, юже обрет, паки к Небеси возводит. Темже Тя вси яко Матерь Божию православно величаем.

Кондак, глас 8

Воздержанием тело духу поработив, душу же равноангельну сотворив, святительскою одеялся еси одеждою, яко венец священства, и ныне, всех Владыце предстоя, моли, всеблаженне Митрофане, умирити и спасти души наша.

Икос

В пустыни высотою смиренномудрия, яко райский цвет, красуяся, и на Воронежския Церкви престоле украсился еси высокими удобрениями, премудре, ибо был еси иерарх, образ верным словом и житием. Темже и Бог яко угодника Своего вознесе тя, нетлением и чудесы в Церкви Своей прославляя, да вси верою зовем ти: радуйся, Воронежская похвало, Митрофане приснопамятне.

Песнь 7

От Иудеи дошедше, отроцы в Вавилоне иногда верою Тройческою пламень пещный попраша, поюще: отцев Боже, благословен еси.

Святителю отче Митрофане, моли Бога о нас.

Нас обновити хотя и нашему спасению, Спасе, благопоспешити, Ты новаго Церкви Своей воздвигл еси светильника, Митрофана, к Тебе зовуща: отцев Боже, благословен еси.

Святителю отче Митрофане, моли Бога о нас.

Человеколюбца Спаса о нас, святителю Христов, умоли разрешитися нам от прегрешений наших и душевных скверн, да и мы Тому яко Всесильному Избавителю зовем: отцев Боже, благословен еси.

Слава: В славу Божию одеянный святитель и чудотворец нам от Бога показался еси, Митрофане всехвальне, да светлостьми чудес твоих паче солнечных луч озаряемы, зовем дивная тобою Совершающему: отцев Боже, благословен еси.

И ныне: Великая дарования Тобою от Господа прияхом, Дево Пречистая, сего ради благодарственное пение приносим Ти и зовем: Благословенна Ты в женах еси, Всенепорочная Владычице.

Песнь 8

Царя Небеснаго, Егоже поют вои Ангельстии, хвалите и превозносите во вся веки.

Святителю отче Митрофане, моли Бога о нас.

К честным мощам твоим, яко к необоримому покрову, прибегающе, немолчнаго твоего ходатайства, Богоносе преподобне, просим: ты же не презри иже от тебе требующих помощи, но услыши и заступи всех, поющих тя и превозносящих Христа во веки.

Святителю отче Митрофане, моли Бога о нас.

Телесныя слабости и душевныя недуги силою молитв твоих благодатно пременяя, премени, отче Митрофане, всякое неможение поющим тя и превозносящим Христа во веки.

Слава: Плачущим ты слезы отираеши, пастырю преблаженне, и бедствующим подаеши руку спасения от Бога, темже и нас у Престола Владычня помяни, верою поющих тя и превозносящих Христа во веки.

И ныне: Величаем Твое твердое заступление, исповедуем Матерния Твоея молитвы силу, благодарим возвеличившаго Тя Господа, рождшагося от Тебе, Богомати, Егоже моли спастися душам нашим.

Песнь 9

Воистинну Богородицу, Тя исповедуем, спасении Тобою, Дево Чистая, с Безплотными Лики Тя величающе.

Святителю отче Митрофане, моли Бога о нас.

Ты, иже в Дому Твоем угодников Твоих насаждаеши, яко маслины и яко кедры, Спасе, Митрофана угодника Твоего молением насади в нас добродетельное житие, да во время свое принесем Ти плоды покаяния.

Святителю отче Митрофане, моли Бога о нас.

Со Ангелы, служителю Святей Троице, Митрофане премудре, радуйся, и нам, верою блажащим тя, подаждь молитвами твоими о Дусе Святе радоватися.

Святителю отче Митрофане, моли Бога о нас.

Аще и немощны есмы и премного согрешаем, недостойнии, но не отступаем надежды мощнаго покрова твоего, достославне: ты же, Христу Богу моляся, помози нам обрести всем с лики праведных стояние в День судный.

Слава: На месте озлобления немощи смирившемуся, удиви молитв твоих силу, чудотворче святый, Митрофане, и по данной тебе целеб благодати нездравие мое во здравие премени.

И ныне: Упование и радосте наша, Марие Богоневестная, покрый нас честным Твоим омофором, да хвалим непрестанно имя Твое и поем с Безплотными Лики, Тя величающе.

Светилен:

Светозарна светильника веры, Божественно и преславно от Светоначальныя Троицы возсиявша и нас солнца светлейше чудесы своими просветивша, Митрофана, пастыря блаженна, песньми восхвалим.

Слава, и ныне, Богородичен:

Богородице Дево, радуйся, от Ангела радость приимшая; радуйся, Владычице, и спаси на Тя уповающих.

По изданию: Минея: Ноябрь. Ч. II. М.: Издание Московской Патриархии, 1998.


Возврат к списку

Вернуться на главную страницу


Расписание богослужений

27/10 декабря, понедельник

Иконы Божией Матери, именуемой «Знамение».

Вмч. Иакова Персянина.

5.45 Полунощница. Молебен у мощей прп. Евфросинии.

7.15 Часы. Божественная Литургия. 16.45 Вечернее богослужение.

Смотреть все

Православный календарь

27 / 10 декабря, понедельник

Седмица 29-я по Пятидесятнице (ев. чтения 28-й седмицы). Иконы Божией Матери, именуемой «Знамение». Знамение Пресвятой Богородицы, бывшее в Новгороде Великом в 1170 году. Вмч. Иакова Персянина (421). Прп. Палладия (VI–VII). Свт. Иакова, еп. Ростовского (1392). Обретение мощей блгв. кн. Новгородского Всеволода, во Святом Крещении Гавриила, Псковского, чудотворца (1192). Блж. Андрея Симбирского (1841). Собор новомучеников и исповедников Радонежских.

Прмчч. монахов 17-ти в Индии (IV). Прп. Романа (V).

Сщмчч. Николая, архиеп. Владимирского, Василия Соколова, Бориса Ивановского, Феодора Дорофеева, Николая Андреева, Алексия Сперанского, Иоанна Глазкова, Сергия Аманова, Иоанна Хрусталева, Сергия Бредникова, Николая Покровского, Димитрия Беляева, Владимира Смирнова, Иоанна Смирнова пресвитеров, прмчч. Иоасафа Боева, Кронида Любимова, Николая Салтыкова, Ксенофонта Бондаренко, Алексия Гаврина, Аполлоса Федосеева, Серафима Крестьянинова, Никона Беляева и мч. Иоанна Емельянова (1937).

Икон Божией Матери «Знамение»: Курской-Коренной (1295), Абалацкой (1637), Царскосельской, Серафимо-Понетаевской (1879), Верхнетагильской (1753) и именуемой «Корчемная» (XVIII).

Смотреть все

Каталог TUT.BY