Русская Православная Церковь
Московский Патриархат
Белорусская
Православная Церковь

При использовании материалов
ссылка на сайт
www.spas-monastery.by обязательна

Дорогие гости сайта!
Если у кого-либо из вас сохранились материалы, касающиеся истории нашего монастыря (документы, фотографии и др.), пишите нам по адресу электронной почты spas.monastery@gmail.com Будем благодарны за любую помощь.

Канон Пресвятой Богородице пред Ее иконой, именуемой «Скоропослушница»

Распечатать

Глас 8

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Пресвятая Богородице, спаси нас

Чудес Твоих Божественных множество благохвалити предпринимая, Тя молю, Дево, от сердца, Скоропослушнице, благодать подаждь ми.

Пресвятая Богородице, спаси нас

Кто не изумится Твоего образа чудесем, Дево? От него бо служителю трапезы возгласила еси трижды, Скоропослушница нарекшися.

Пресвятая Богородице, спаси нас

Како чудодеяние Твое изрещи возмогу, Отроковице? Ты бо прежде непокорнаго инока безочна соделала еси и паки сего устроила еси видяща.

Пресвятая Богородице, спаси нас

Радуйся, священная обитель Дохиарская: ты бо имаши всех Госпожу Предстательницу и покров, якоже Сама Она ясно возвести.

Другий канон, глас 4

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Пресвятая Богородице, спаси нас

Мати Присносущнаго Света и Отчия Премудрости, умудри неразумие мое и просвети мя на пение и молитву пред святою иконою Твоею, Скоропослушнице.

Пресвятая Богородице, спаси нас

Обретшии сокровище радуются, темже и мы, имуще Тя, Всецарице, милосердия сокровище Небесное и неиждиваемое, воспеваем, радующеся, Твоя чудеса.

Слава: Лицу Твоему, − предрече Давид, − помолятся богатии людстии; исполняющуся сему, вкупе с богатыми и мы, добродетельми убозии, молимся Тебе, Дево, пред ликом Твоим.

И ныне: Якоже очи раб в руку господий своих, тако очи наши устремлени суть к Тебе и к образу Твоему, Всеблагая Владычице, дондеже ущедриши рабы Твоя.

Песнь 3

Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Пресвятая Богородице, спаси нас

Безчадных благочадных Ты, Марие, показала еси и неплодных жен соделала еси, Скоропослушнице, веселящихся о чадех. Кто убо не изумится, Дево, величию Твоему?

Пресвятая Богородице, спаси нас

Булгария проповедует Твоего образа чудеса, о Скоропослушнице, восток же и запад. Источник бо соделалася еси, точащий благодати всем призывающим имя Твое.

Пресвятая Богородице, спаси нас

Рака болезнь от руки исчезает честныя жены, Дево, посещением Твоим, темже страждущая, от недуга свободившися, радующися, проповеда благодарственная.

Пресвятая Богородице, спаси нас

Чудно украсися икона Твоя, Скоропослушнице, и паче лучей солнечных освещает всех благодатию Твоею, Пречистая. Кто убо не восхвалит Тя, на Небеси и на земли славимую!

Ин

Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Пресвятая Богородице, спаси нас

Воззри Твоими очесы, Марие, и виждь благоутробно пред иконою Твоею предстоящих и Тя с верою призывающих, и услыши сих, Скоропослушнице.

Пресвятая Богородице, спаси нас

Крепость даруй нам, Чистая, да творим волю Сына Твоего со страхом и любовию, укрепляеши бо рабы Твоя яко Матерь Всесильнаго Бога нашего.

Слава: Страстьми боримии и невидимыми сеятелями зол, присно нуждаемся в Твоей, Владычице, необоримой помощи, еяже не лиши нас, Богоблагодатная.

И ныне: Спасительный щит подаждь нам, Госпоже, Твое державное заступление, имже началозлобнаго побеждающе коварства, венцев славы сподобимся.

Седален:

Владычицу Тя мира вемы, Марие Всепетая, яко родила еси нам всех Творца, Спасителя мира, Иже и прослави Тебе, Пречистую Матерь Свою, подая Тобою благодать и милость чтущим Тя и молящимся Тебе, Богородице.

Слава, и ныне, тойже.

Песнь 4

Услышах, Господи, смотрения Твоего таинство, разумех дела Твоя и прославих Твое Божество.

Пресвятая Богородице, спаси нас

Во всех концех чудотворный Твой образ прославися, и ныне вси устами Скоропослушницу произносят.

Пресвятая Богородице, спаси нас

И во сне, Всецарице, и яве, Скоропослушнице, являяся, чудеса совершаеши в мире преславная.

Пресвятая Богородице, спаси нас

Кто Твое, Дево, имя в нужде всякой призываше, и скоро того не услышала еси, яко Скоропослушница сущая?

Пресвятая Богородице, спаси нас

Блаженна еси Дохиарская обитель славная, иконою бо обогатилася еси Скоропослушницы всечестною.

Ин

Седяй в славе на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей.

Пресвятая Богородице, спаси нас

Припадая ко святей иконе Твоей, Дево, вопию Ти от сердца сокрушенна: не попусти ми погибнути, Всемилостивая Госпоже, житие мое во гресех иждившему.

Пресвятая Богородице, спаси нас

Грехолюбив сый, удалихся, Владычице, Сына Твоего, и лишен есмь дерзновения к Нему. Темже к покаянию мя направив, сподоби получити, еже погубих.

Слава: Богоизбранная Отроковице, в руне орошенном предвиденная, окропи росою благодати изсохшую землю сердца моего и благоплодну соделай душу мою.

И ныне: Радуйся, Богоневесто, добродетельми, яко рясны златыми, преукрашенная; радуйся, сосуде мира, имже врачуются зовущии: слава, Христе, силе Твоей.

Песнь 5

Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Пресвятая Богородице, спаси нас

Како на Твой пречистый образ аз, недостойный, воззрю, Скоропослушнице, нечистыми очесы моими!

Пресвятая Богородице, спаси нас

Море и земля, Всецарице, Твоея иконы чудеса проповедуют: Твоих бо благодатей сия обоя насладишася.

Пресвятая Богородице, спаси нас

Татя являеши, пенязи похитивша ближняго, Матеродево, и возвращаеши праведно сия имущему.

Пресвятая Богородице, спаси нас

Что воздадим Тебе, Всеблагая, за благодать многую, юже явила еси нам, даровав икону Твою, богатство священное.

Ин

Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Пресвятая Богородице, спаси нас

Несть, Всемилостивая Госпоже, таковаго, иже бы лишися щедрот Твоих, прибег с верою к Твоему благоутробию. Темже прилежно молим Тя: сподоби и нас грешных милости Твоея.

Слава: Умилостивление о всем мире сущая, умоли, Дево, Сына Твоего, всех Судию, да не помянет грехов наших, и да избавимся Тобою всякаго прещения Его, находящаго на люди согрешившия.

И ныне: Примирителя всяческих рождшая, всемощным предстательством Твоим, Владычице, умиротвори нас к Нему, к ближним и к себе самим, яко воспевающим Тя мир подавающая.

Песнь 6

Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Пресвятая Богородице, спаси нас

Яко любвеобильная Матерь явльшися, призывала еси отрока к Себе, дондеже избавила еси от руки разбойников, Матеродево. Но да обретем Тя и мы, Матерь любвеобильную!

Пресвятая Богородице, спаси нас

Не имамы раби Твои иного, разве Тебе, предстательства и покрова. Темже, Чистая, от сердца вопием: всякия беды свободи стадо Твое и верных, к Тебе прибегающих.

Пресвятая Богородице, спаси нас

Якоже спасла еси от морския бури призвавших Божественное имя Твое, тако и нас от чувственнаго крушения и мысленнаго, Дево, спаси и в тихия пристанища спасения управи.

Пресвятая Богородице, спаси нас

Мир Тя прибежище стяжа и спасение; тем, Чистая, к честней Твоей иконе отвсюду притекают людие, и вси скоро их слушающую обретают Тя.

Ин

Божественное сие и всечестное совершающе празднество, Богомудрии, Богоматере, приидите, руками восплещим: от Нея рождшагося Бога славим.

Пресвятая Богородице, спаси нас

Ты − рабов Твоих утешение, Всеблаженная, Ты − свет, удобрение и надежда спасения; Ты убо промышлением Твоим всякия нужды и скорби избави нас.

Пресвятая Богородице, спаси нас

Ведущи немощи наша, Богородительнице, восполняй духовную и вещественную скудость нашу, да подающаго нам Тобою вся благая Бога славим.

Слава: Не остави нас, Всещедрая, внегда оскудевати крепости нашей, не отступи от уповающих на Тя во исходе и по исходе яви нам благости Твоея силу.

И ныне: Преблагословенная Марие, книга Божия запечатленная, в книзе живота вечнаго написатися нам сподоби, да от Тебе рождшагося Бога славим.

Кондак, глас 8

В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.

Икос

Идеже осенит благодать Твоя, Владычице, тамо недужнии здрави бывают, бедствующии во благополучие приходят, и всяк скорбящий радости исполняется. Темже благодатию Твоею осени и нас, сицевая радостная Тебе глаголющих: радуйся, Богоблагодатная, Неприступнаго Божества селение; радуйся, святая трапезо, хлебом жизни нас снабдевающая; радуйся, миро многоценное, облагоухающее верных; радуйся, маслино, елеем милосердия нас умащающая; радуйся, неистощимое сокровище даров; радуйся, приснотекущий источниче чудес; радуйся, обидимых заступление; радуйся, обуреваемых благоутишное пристанище; радуйся, глухих слышание и свете слепых; радуйся, разслабленных укрепление; радуйся, свобождение плененных; радуйся, мира всего упование; радуйся, Всеблагая Скоропослушнице.

Песнь 7

От Иудеи дошедше, отроцы в Вавилоне иногда верою Тройческою пламень пещный попраша, поюще: отцев Боже, благословен еси.

Пресвятая Богородице, спаси нас

Слепым даровала еси действие очесем, Дево, еже видети, но и наша зеницы души и телесе просвети, да поем присно величия Твоя.

Пресвятая Богородице, спаси нас

Глухим слышание даровала еси, Марие Скоропослушнице, но и нас всех отверзи ушеса души и телесе, яко да поем присно величия Твоя.

Пресвятая Богородице, спаси нас

Якоже древле от пругов избавила еси прибегших к Тебе, Пречистая, тако и нас от сих и всякаго вреда избави, да поем присно величия Твоя.

Пресвятая Богородице, спаси нас

Яко исправила еси прежде разслабленнаго, тако и нас, по обою разслабленных, теплым Твоим предстательством исправи, да поем присно величия Твоя.

Ин

Не послужиша твари Богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородице, спаси нас

Наставнице ко спасению рабов Твоих, души тричастное, Госпоже, исправи, да благодати безстрастия сподобльшеся, поем: препетый отцев Господь и Бог, благословен еси.

Пресвятая Богородице, спаси нас

Желательную силу души к Божественному рачению направи, да тою Бога всецело возлюбим и к Нему присно стремимся, яко всеблаженному желаний краю.

Слава: Яростную силу души помози нам, Дево, обращати на невидимыя враги спасения нашего и спасительныя любве исполни сердца наша к ближним и к Богу.

И ныне: Словесное души к Богоугодному созерцанию воскрыли, Владычице, богопротивных помышлений избавляющи, и всех нас благое мыслити, глаголати и творити укрепи.

Песнь 8

Царя Небеснаго, Егоже поют вои Ангельстии, хвалите и превозносите во вся веки.

Пресвятая Богородице, спаси нас

От всяких болезней, Скоропослушнице, нас избави, якоже от сих многих избавила еси.

Пресвятая Богородице, спаси нас

Икона Твоя, Дево, показася источник чудес, от негоже жаждущии снабдеваются изобильно.

Пресвятая Богородице, спаси нас

Погибшаго Ты являеши, Госпоже, и подаеши радость обретшим. Коль многая есть образа Твоего благодать!

Пресвятая Богородице, спаси нас

Повелению Твоему, Владычице, повинуются вся стихии, от нихже вреда да избавляеши Тя призывающих.

Ин

Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.

Пресвятая Богородице, спаси нас

Пажить плодоносну обретает стадо под Твоим, Богомати, управлением, и душетленнии волцы не мощны расхитити словесных овец, хранимых благодатию Сына Твоего и Бога.

Пресвятая Богородице, спаси нас

Блажен человек, емуже есть заступление его от Тебе, Богоневесто, присно бо полагает таковый восхождения в сердце своем, дондеже узрит себе спасенна и воспоет: Господа пойте дела и превозносите Его во вся веки.

Слава: Седмисвещный светильниче, седмию дарами Духа светящий, сподоби и нам украситися духовными плодами, да, ущедреннии чрез Тебе Богом, поем: Господа пойте дела и превозносите Его во вся веки.

И ныне: Горо Божия, в Нейже благоволи жити Бог, молися к Нему о нас, да помощию Его благое творяще, сподобимся узрети премирныя горы и тамо пети: Господа пойте дела и превозносите Его во вся веки.

Песнь 9

Воистинну Богородицу Тя исповедуем, спасеннии Тобою, Дево Чистая, с Безплотными лики Тя величающе.

Пресвятая Богородице, спаси нас

Соберитеся усердно в обитель Божественную Архангелов, болящии: Врач бо в ней пребывает безмездный.

Пресвятая Богородице, спаси нас

Священная икона Твоя другая показася Силоамская купель, Дево, очищающая и целящая болезни души и телесе.

Пресвятая Богородице, спаси нас

Воспламеняет мя рачение зрети Твоего образа благодатную лепоту, и насыщения не имам величати Тя!

Пресвятая Богородице, спаси нас

Да увижду Тя, Всеблагая Скоропослушнице, во время смерти утешающую мя и зраки демонов отгоняющую!

Ин

Всяк земнородный да взыграется, Духом просвещаем, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородице, спаси нас

Помяни, Госпоже, рабы Твоя, любовию славящия Тя, услыши молящихся к Тебе и молитвами Твоими благоуветлива нам соделай Сына Твоего и Бога зде и на Страшном Суде Его, Всеблаженная Богородице, Чистая Приснодево.

Пресвятая Богородице, спаси нас

Радосте Ангелов и человеков, свободны нас печалей житейских сотвори и ходатайством Твоим не кончаемых мук избави, да временных и вечных бед Тобою избывше, вопием: радуйся, Всеблаженная Богородице, Чистая Приснодево.

Слава: Видимо пред образом Твоим предстояще, невидимо же к Тебе, одесную Сына Твоего стоящей, ум возводяще, молим Ти ся прилежно: сподобитися нам райскаго блаженства умоли, Всеблаженная Богородице, Чистая Приснодево.

И ныне: Благаго Царя Благая Мати, осени ны необоримым покровом Твоим, Всеблаженная Богородице, Чистая Приснодево.

Светилен:

Зрящии Тя ныне на иконе с Предвечным Младенцем, просим Тебе, Богоневесто: не лиши нас и в будущем веце всеблаженнаго лицезрения Твоего и воплотившагося от Тебе Сына Божия, да со благоугодившими Ему Имя Его и Твое величаем.

По изданию: Минея: Ноябрь. Ч. I. М.: Издание Московской Патриархии, 1998.


Возврат к списку

Вернуться на главную страницу


Расписание богослужений

10/23 октября, понедельник

Прп. Амвросия Оптинского.

Мчч. Евлампия и Евлампии.

5.45 Полунощница. Молебен у мощей прп. Евфросинии.

7.45 Часы. Божественная Литургия.

16.45 Вечернее богослужение с полиелеем.

Частица св. мощей прп. Амвросия Оптинского, имеется в обители. 

Смотреть все

Православный календарь

10 / 23 октября, понедельник

Седмица 21-я по Пятидесятнице. Мчч. Евлампия и Евлампии (303–311). Свт. Иннокентия, еп. Пензенского (1819). Прп. Амвросия Оптинского (1891).

Свт. Амфилохия, еп. Владимиро-Волынского (1122). Собор Волынских святых. Блж. Андрея, Христа ради юродивого, Тотемского (1673). Мч. Феотекна (III–IV). Прп. Вассиана (V). Прп. Феофила исп. (VIII).

Смотреть все

Каталог TUT.BY