Канон свт. Тихону, Патриарху Московскому

Глас 6

Песнь 1

Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Святителю отче наш Тихоне, моли Бога о нас.

Якоже плод красный спасительнаго сеяния Божия явился еси в Церкви, святителю Христов, родителей благочестивых, иерея Иоанна и Анны, быв отрасль предивная.

Святителю отче наш Тихоне, моли Бога о нас.

Предречение дивное во сне отцу твоему о грядущем величии твоем, еще ти отроку сущу, по мнозех летех сбыстся, зане воистинну великий господин Российския Церкве явился еси, блаженне.

Слава: Образ кротости, смирения и любве о Господе являя, добрый помощник юным другом твоим был еси, блаженне, сего ради и тии, еще ти отроку сущу, архиерея Божия прорекоша тя.

И ныне: Спаси нас от всяких бед, Всемилостивая Владычице Богородице, и Твоими молитвами к Сыну Твоему и Богу нашему исцели от греховныя болезни страждущия души наша.

Песнь 3

Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Святителю отче наш Тихоне, моли Бога о нас.

В вертоградех духовных православно богословити и слово Божие иными языки глаголати поучался еси прилежно, блаженне, и сие в церковнем служении твоем добрый плод принесе.

Святителю отче наш Тихоне, моли Бога о нас.

Егда Владыка Господь объятия Отча отверзе ти и яко возлюбленна сына во иночестве Тихона прият тя, тогда начальника в вертоградех духовных Пскова и Казани поставити тя благоволи, да православныя отроки богомудрию и христианскому благочестию научиши, блаженне.

Слава: Холмскую паству добре управити призва тя Владыка Христос, темже и начало положи святительским подвигом твоим, да в них укрепляяся, изряден архиерей Всероссийския Церкве явишися, блаженне.

И ныне: Множества грехов люте обдержат души наша, Ты же, Пречистая Богомати, молитвами Твоими ко Иже от Тебе Рождшемуся пленения сего греховнаго избави и на стезю спасения настави нас.

Господи, помилуй (трижды).

Седален, глас 1:

Доброму евангельскому пастырю подражая, дерзновенно во двор овчий вшел еси, святителю, и, своя овцы глашая по имени, во ограде церковней тыя невредимо соблюл еси.

Слава, и ныне, Богородичен:

К Тебе, о Богомати, молитвенно мы ныне прибегаем и предстательства Твоего пред Сыном Твоим усердно просим: от греховнаго ловительства сохрани нас и на путь спасения настави.

Песнь 4

Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Святителю отче наш Тихоне, моли Бога о нас.

Смотрению Божию следуя, велению матере Церкве повинуяся, земли дальния Американския достигл еси и тамо новую паству, людей алеутских, креольских, кенарских, во ограде Христовы Церкве яко добрый пастырь соблюл еси, Тихоне блаженне.

Святителю отче наш Тихоне, моли Бога о нас.

Радуйтеся и веселитеся, верныя чада Церкве Российския, иже в Пенсильвании, Калифорнии, Флориде и иных землях Американских сущая, святитель бо Тихон ныне Престолу Божию предстоит и молится о спасении душ наших.

Слава: Кронштадтскаго пастыря собеседник быти сподобился еси, блаженне, еще сый епископ града Ярославля, и той ти всероссийское пастырство предуказа. Темже и ныне с ним, Престолу Божию предстоя, моли спастися душам нашим.

И ныне: Достойно есть прославляти Тя, Владычице, присно спасающую землю Российскую. Се бо и святитель Тихон в Ярославстем храме Успения Твоего государя Николая яко истиннаго Помазанника Божия срете и благодарственныя молитвы вкупе с ним о заступлении Отечества нашего Тебе и Сыну Твоему принесе.

Песнь 5

Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.

Святителю отче наш Тихоне, моли Бога о нас.

Егда по грехом нашим нашествие иноплеменных Господь попусти и земля Российская кровию обагрися, ты, святителю, покаяние проповедуя и врачевству душевному и телесному страждущих добре содействуя, крепце стояти за веру Православную, царя благовернаго и Отечество святое призывал еси.

Святителю отче наш Тихоне, моли Бога о нас.

Ополчению вражеску у стен града Вильно стоящу, цельбоносныя мощи святых мученик Антония, Иоанна и Евстафия из обители Святаго Духа благоговейно изнесл еси, святителю, и во граде Москве от поругания иноземных невредимы сохранил еси.

Слава: Благоволением Божиим и народа Божия избранием Московский архипастырь поставлен был еси, святе, темже и достойный преемник Московских святителей явился еси.

И ныне: Ангельский собор и человеческий род о Тебе радуется, Благодатная Марие, Мати Неискусомужная, Невместимаго бо во чреве вместила еси и родила еси Спаса миру.

Песнь 6

Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Святителю отче наш Тихоне, моли Бога о нас.

Пустынножитель старец, пред образом Владычицы усердно моляся, жребий со трепетом из ковчежца извлече, на немже имя твое яко Богом избраннаго первосвятителя начертано бе. Сего ради и мы ныне, якоже тогда иерарси собора, немолчно аксиос тебе, архипастырю наш, вопием, сотвори и нас яко словесныя овцы достойны быти пажити твоея.

Святителю отче наш Тихоне, моли Бога о нас.

О глубины богатства и премудрости Божия! Изволися Духу Святому со иерарси поставити тя, блаженне, Патриарха Церкве Российския, да во дни испытания веры свидетельствуеши крепкое в ней стояние и паству твою неврежденну от наветов вражиих добре соблюдеши.

Слава: О неизреченныя любве и милосердия Божия! Святитель Тихон во главу Российския Церкве поставляется, и мнози людие добраго пастыря обретают и во ограде церковней соблюдаются.

И ныне: Радуются и ликуют людие российстии, Приснодево, Введение Твое во храм празднующе, и, возведение святителя Тихона в Патриарха Российскаго в сей же день благодарне воспоминающе, усердно взывают Ти: О Владычице Державная! Молитвами святителя Тихона Церковь и землю Российскую от всех наветов вражиих спаси и вся верныя в чертоги Небесныя введи.

Господи, помилуй (трижды). Слава, и ныне:

Кондак, глас 2

Тихостию нрава украшен, кротость и милосердие кающимся являяй, во исповедании Православныя веры и любве ко Господу тверд и непреклонен пребыл еси, святителю Христов Тихоне. Молися о нас, да не разлучимся от любве Божия, яже о Христе Иисусе, Господе нашем.

Икос

Ангелов Творец и Господь в буреносныя дни мятежа и нестроения велия, восхотев людем страждущим утешение даровати, яви тя, Патриарше претихий и предобрый, яко светило светозарное, светом Трисияннаго Божества озаряющее души верных, да и ныне грядут по тебе вси желающии со Христом быти, сего ради во умилении вопием ти: радуйся, от жребия патриаршества аки от монашескаго послушания не уклонивыйся; радуйся, ревностному исполнению Божественных хотений научивыйся; радуйся, на престол патриарший, двесте лет пустовавый, в день Введения во храм Пресвятыя Богородицы возшедый; радуйся, в день Благовещения со престола первосвятительскаго ко Престолу Пресвятыя Троицы прешедый; радуйся, первосвятительством и исповедничеством украшенный; радуйся, Бога ради поживый и Богом просветленный; радуйся, подвигом своим патриаршество непреложно утвердивый; радуйся, образ пастыря добраго собою явивый; радуйся, Донския обители сугубое прославление; радуйся, Православныя Церкве во Америце утверждение; радуйся, российския паствы боговидное наследие; радуйся, богоначертанный свитче правыя веры; радуйся, святителю Тихоне, Церкве Православныя похвало и утверждение.

Песнь 7

Росодательну убо пещь содела Ангел преподобным отроком, халдеи же опаляющее веление Божие мучителя увеща

 Святителю отче наш Тихоне, моли Бога о нас.

Плач, стенание и горе великое, грядущия на Церковь Российскую, предзрел еси, первосвятителю, обаче, Христовою любовию укрепляемь, мужественно взывал еси: благословен еси, Боже отец наших.

Святителю отче наш Тихоне, моли Бога о нас.

В лютую годину первосвятительский жезл со страхом и трепетом приим, блаженне, Церковь Российскую, яко корабль нерукотворный, добре управил еси, верныя же научил еси взывати: благословен еси, Боже отец наших.

Слава: Пророку древнему Илии, взыскующу не преклоньших колена пред Ваалом, подражал еси, первосвятителю, да взыщеши люди, иже не преклониша выю ловительству безбожных, таже и падших из глубины греховныя воздвигнеши, и верныя научиши в скорбных обстояниих взывати Господу: благословен еси, Боже отец наших.

И ныне: Помощницу надежную имамы Тя, Богородице, многажды бо в скорбных обстояниих предстательство о людех российских пред Сыном Твоим являла еси.

Песнь 8

Из пламене преподобным росу источил еси и праведнаго жертву водою попалил еси, вся бо твориши, Христе, токмо еже хотети, Тя превозносим во вся веки.

Святителю отче наш Тихоне, моли Бога о нас.

Во образ твоего усерднаго подражания служению первосвятителей Московских в священныя одежды тех достойно облачен был еси, блаженне, темже с ними о нас молися, да и мы достойни будем превозносити Господа во вся веки.

Святителю отче наш Тихоне, моли Бога о нас.

Жезл первосвятителя Петра со дерзновением приял еси, блаженне, да образ власти предстоятеля в Церкви Российстей возставиши. Мы же, ведяще сицевую милость Божию к нам, Господа превозносим во вся веки.

Слава: Грехом нашим умножившимся, попусти Господь братоубийству и междоусобным бранем в земли Российстей быти. Ты же, святителю, людей враждующих к покаянию и примирению призывал еси, научая превозносити Христа во веки.

И ныне: В дому Твоем, Пречистая Дево, храме Успения Твоего, поставление блаженнаго Тихона в первосвятителя Российскаго совершися, темже молитвы того, яко вернаго служителя Твоего, к Богу вознеси и спаси души наша.

Песнь 9

Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.

Святителю отче наш Тихоне, моли Бога о нас.

Плачем и рыданием земля Российская огласися, кровь святых мученик и исповедник Христовых потоки по ней излияся, храмы Божии осквернишася и попранию предашася. Увы мне, земле моя! взывал еси, святителю. Кое врачевание прилежит ти, да всех сих избавишися?

Святителю отче наш Тихоне, моли Бога о нас.

Увы мне, людие российстии! взывал еси, блаженне. Господа забыхом, в делех наших осуетихомся, попечения же о души николиже имехом. Ей, глаголю вам, благоволения Божия не обрящем, аще души наша слезами покаяния пред Господем не потщимся очистити.

Святителю отче наш Тихоне, моли Бога о нас.

В темнице томящуся ти, святителю, о Церкви премного болезновал еси, иерарси бо и священницы нецыи, на стезю Иуды предателя ступивше и неправедно власть в Церкви восхитивше, злохудожная деяния своя яко обновления благая нарекоша, и сим паству российскую в смятение приведоша, и в нестроениих церковных тяжце повинни быша.

Слава: Ни скорбь, ни теснота, ни гонение, ни глад, ни нагота, ниже беда, ни меч не возмогут разлучити верных чад Христовых от любве Его, апостольски рекл еси, святителю.

И ныне: Кия похвалы возгласим Ти, Пречистая? Киими словесы величие Твое возславим, яко Спаса родила еси душ наших?

Светилен, глас 1:

Первосвятителя Российскаго Тихона днесь прославим, память его благочестно почитающе, той бо, яко светильник пресветлый, просиял есть и образом пресветлаго жития своего ревностному служению люди научает.

Слава, и ныне, Богородичен:

Радуйся, Богородице Дево, Владычице Державная, Светодавца Христа миру рождшая; радуйся, похвало всея вселенныя; радуйся, Пречистая Мати Божия Благословенная.

По изданию: Минея дополнительная. Выпуск 1. М.: Издание Московской Патриархии, 2005.